商機收料站 : 暑期學做企業領袖

暑期又到，新一屆「青少年企業領袖訓練計劃」又再招募參加者，呢個課程由理工大學企業經管人才發展中心開辦，主要係想畀年輕人認識中港兩地營商模式。負責人簡小姐同我講：「今年已經係第7屆，我每年會接受約160位參加者，分成4班接受訓練，以往幾屆都爆滿。」
學員除會被安排到愛丁堡公爵訓練營，學習領導才能以及團隊精神外，仲有得入住理大宿舍，預先體驗大學生活，同一眾大學生交流。而且仲會有2次考察香港及內地企業活動，畀學員參觀中港兩地企業架構、管理模式等。好似往年就參觀過李錦記國際控股有限公司、中港車身製造廠等，講真家咁多人北上發展，知道定內地營商環境亦係好事。
課程課程顧問及客席講師，全部都係大機構高層或專業人士，好似中國工商銀行亞洲商業信貸業務副總經理唐希強、國際企業管理公司董事周偉堂等，相信呢管理層身上，一定可以學到唔少，仲可以發掘定第時升學或就業興趣添。好似舊年學員Joanne就話個計劃令佢搵到方向，「我參加完計劃心理評估，同埋同專業人士傾完偈之後，發現自己對數字最敏感，而且對科研比較有興趣，所以我今年就入讀英國劍橋大學數學系，希望學以致用。」咁多學，對年輕人講真係一個有益暑期活動。

青少年企業領袖訓練計劃
對象：中三至中七學生
費用：$5,300（包10日課程的食宿及交通）
開課日期：7月21日起
查詢電話：34002946
網址：http://www.polyu.edu.hk