真人show : 我在酒吧的日子（下集）

沒一份工做得長的Marco，入了酒吧做見習bar tender，頭一星期因工作懶散兼曠工，被酒吧老細阿Ken請食「豉椒炒魷」，平常當「食生菜」的他，今次卻感到異常失落與不忿……2008-02-10玩！玩！玩！
農曆年首要任務係同親戚拜年，次要任務就係喪玩！自從返番酒吧，每日放工成個都散晒，差不多謝絕蒲界，放假一樣屋企，條女詐晒型，冇計，如果唔係第二日點返工？但係咁喎，耐冇蒲再出玩番，真係覺得特別好玩！開心好多喎！
好似今日約埋阿Wing同其他fd出篤波，雖然唔係鋪鋪贏，但種開心……真係唔知點形容，可能真係物以罕為貴？少打反而珍惜玩時光，以前日日蒲好似例行公事咁……估唔到返工都有呢個好處！

2008-01-25惡補酒經
尋晚唔夠一點就，所以今日準時2pm返到公司。我即醒水換制服開工。差不多四點鐘開始多人，呢次我冇充大頭鬼，逢親有order唔識都會問人，但始終都係「瀨」！
有個客order成支紅酒，我一斟酒佢即刻喊停。「你有冇常識？斟酒陣個樽口都唔包番條毛巾，咪滴到周圍都係囉！」以前我已經同佢鬥×，不過我同自己講點都要忍，即刻「沙」。之後再諗番，其實個客都係袋錢落我袋，咁樣諗條氣當堂順番晒。
收工順手埋本「bar tender聖經」（酒吧大佬寫落60款酒調校方法）返屋企惡補，阿Ken見到就問：「轉性呀？咁勤力？」我冇出聲，佢叫我陪食宵夜兼傾閒偈，之後傾到公事，阿Ken話背本「聖經」都唔夠，仲有好多要留意，例如威士忌都有好多種，叫法亦不同。「如burbon、rye都係威士忌，個客講出你唔識幾瘀皮？」結果晚我傾到朝早6點幾，阿Ken教我唔少。以前出蒲以為自己好識酒，過呢晚先知自己屎皮到爆。

2008-01-21做番齣好戲
呢幾日勁down，冇出過街屋企漚。以前被人炒，例牌叫班friend出狂歡，今次完全冇心情，直到今朝媽子同我傾偈，我先開始有明解……
事緣今朝佢返工前，笑笑口走埋問我：「次次冇工開你都會連玩幾日先，做乜呢幾日黐家咁乖仔？」我求其敷衍佢兩句，佢又同我講：「由細到大我都唔管你，你唔學壞我已經要還神。不過你打工次次都做唔長，唔係話個老細唔好，就係話好辛苦，其實有邊份工唔係咁？你可唔可以唔好郁就放棄，做番齣好戲畀阿媽睇，等我唔使擔心？」
一聽呢句我成個人震晒！點解同阿Ken講咁似？我一個人屋企諗好耐，愈諗媽子同阿Ken說話就愈入腦，我由細到大做乜都三分鐘熱度。我決定做番齣好戲……
「喂？」我打阿Ken手提，但一聽到佢把聲，我又唔知講乜，成分鐘之後先「得」出一句：「阿Ken，我係Marco，上次對你咁冇禮貌對唔住，希望你畀多次機會我……」
大約半分鐘之後（我覺得好似成年），阿Ken只係講一句：「星期五又要炒場，你係做就準時兩點返，聽住，遲一分鐘你都唔使返！」
「一定得，多謝晒！」我狂點頭，雖然阿Ken見唔到。

Marco 19歲
行業：Bar Tender
簡介：入職4個月的Marco，愛玩愛蒲，中五輟學後已轉過多份工。他的做人宗旨為「今天的事明天做，明天的享樂今日玩埋佢！」由最初入行只想溝女威，直至慢慢了解自身工作的意義與責任，現已成為獨當一面的bar tender。

2008-05-03最佳男主角！
今日出糧，見到張糧單，點解多咁多錢？！問經理Angel，佢手指指，叫我自己問阿Ken。「今日開始你正式係bar tender啦，人工當然加番咁。」阿Ken又木無表情咁同我講！嘩！一刻真係想講「阿媽！我得啦！」呢世仔第一次咁有成功感！打電話同阿媽報喜，佢冇出聲，我諗佢忍住喊，之後只係講句：「我都話你得啦！」跟住大家都笑出，一切盡在不言中！收線正想開工，Angel同我講，話今日有新人返bar，叫我帶一帶佢。「？我邊得呀？」我同佢講。佢拍我膊頭笑笑口：「只要你肯做，點會唔得？我信得過你！」
嘩！畀咁大壓力我呀？不過今日我真係好開心，原來受人重用係咁好feel！個新人唔知點呢？千祈咪好似我最初咁就得……

*看了Marco故事的讀者，若想與他聯絡，可send e-mail至mailto:marcosin@sinaman.com

回應
酒吧老闆Ken 2008-05-05
好開心你冇令我失望！亦好意外你做得到！老實講，最初請你返，都真係因為人手唔夠，如果你真係再失蹤遲到，我炒硬你。但估唔到你幾個月落真係冇再犯，仲有客讚你添！你得，畀心機！

女朋友仔 YK 2008-05-03
好威呀BB你！之前成日見唔到你發你脾氣，呢度先同你講sorry囉！你之前成日話要做bar tender，今日終於做到啦！畀心機，我個BB好叻！不過咪撩女仔喎！俾我發現扭你耳仔！


新欄目〈真人騷〉會找來各行各業人士現身說法，以寫blog形式，與大家分享他們工作上的苦與樂。