真人騷 : 少年演藝經理人 苦與樂（下集）

真人騷 : 少年演藝經理人　苦與樂（下集）
由今期開始，我增設新欄目〈真人騷〉，找來各行各業人士，現身說法，以寫blog形式，與大家分享他們工作上的苦與樂。Carman Li profile年齡﹕23行業﹕演藝人經理做幾耐：6年。自17歲起通街捉人做模特兒，半年後由助手升到做演藝人經理，發掘過大小藝人模特兒超過100位，從在街邊搵模、到跟模特兒，練到無敵腳骨力、意志力及厚臉皮。上期提要：17歲會考1分Carman，最初半年加入演藝公司，在街上招攬各種年齡人士，最初企足8粒鐘受盡奚落……到最後施以巧計，終於找到第一個model的故事……升職被潑冷水網誌日期：2003-3-10今日發生「大單野」，莫講話自己一舊雲咁，屋企人同朋友都勁擔心！話說旺角企足6個鐘，傍晚返到公司，失驚無神經理忽然召我入去。「Carman，你呢大半年來搵到成百個演藝人，唔少同你合作過演藝人亦話跟job夠細心，所以公司決定升你為演藝人經理，畀心機啦！」打畀阿媽報喜，誓估唔到第一個反應係……「你間公司咁易升人？」簡直一盆冷水照頭淋。即刻搵老死阿Ann同Rick戥我開心，點知異口同聲：「你小心喎！」佢兩個一直當我係細路女，驚我俾人呃。哼！我就做好畀你睇，證明我係真材實料！好彩，同事收到風知我升職，即刻一齊食飯慶祝，都番我開心。連續工作22小時網誌日期：2004-8-1今日要跟名模陳小韻，為電影拍一段出街只有幾分鐘片段，點知拍足24粒鐘，由朝拍到晚再拍到朝早！只因導演超級認真，佢要試唔同效果，我就跟住小韻補妝、照顧佢飲食、幫佢打點一切咁。大熱天時顧得佢個妝，自己最後曬到變人乾，好彩拍攝場地附近行10零分鐘就有公廁，否則我真要百忍成金囉！專業精神最緊要網誌日期：2005-3-20轉眼做兩年，期間主要工作，都係interview同事搵番target model，唔使再掃街，舒服好多。In到，我就會以拆賬形式同佢合作，一般係演藝人佔80%，我佔20%，好少要簽，因為一要求簽約，佢就會有顧慮，驚我呃佢。另外我亦要train一經驗不足演藝人，教識佢最起碼工作程序同基本禮儀，如守時、帶多幾套衫去拍攝現場咁。兩年來都算教出唔少「仔女」，有仲做埋朋友，好似40幾歲Alexis，本身係一位專業人士，佢影都勁專業，導演記者叫做乜永冇say no，呢人先叫有專業精神。P.S.經過兩年後，阿Ann阿Rick都再無懷疑過我公司「係咪呃人」，仲鼓勵我在公司繼續搏殺，good！張德蘭以德服人網誌日期：2007-12-28外行人成日羨慕我做呢行，話我成日有機會同娛樂圈及模界名人接觸，實好開心咁話，其實又幾真喎。好似今日去南京「江蘇新年音樂會」，其中兩位主角係葉振棠同張德蘭，我就負責做德蘭姐貼身保姆。但佢竟然反過來照顧我，連行李都唔使我推，話驚我整親，落機前又提醒我要拎定出入境證明表填定先，又話畀我聽去台灣旅行有乜好玩好食，當正我係女咁。畀我見識到一位巨星級前輩風範，真係「以德服人」，令我多見識之餘，亦發覺一個人若有才華，連品行個性亦有一定修養話，無論做邊行，都自自然會得人敬重兼有口碑。進修再工作網誌日期：2008-05-19唔經唔覺做6年，論收入，當然唔係事事順利，食無定時、睡眠不足更係閒事。但見識肯定比同齡朋友多。每次同大班朋友食飯，佢都話：「你幾好！公司咁信你，又可以見到大明星。收入有成萬三至三萬一個月，比好多大學生更好啦！」但愈做我愈覺得「書到用時方恨少」，讀多書識多，待人接物不單止話題多，處事亦會更有sense，所以遲都會進修一兩項技能好似工管、或者練好普通話，令工作更暢順。網友回應1. Juana 08-05-19仲記得你同事當年中環地鐵站捉我做model，係咁重複「我唔係呃人公司」，諗番起都覺得好笑。我做財務策劃，係唔係呃人自問一睇就知。上到office就見到你，個樣成個妹咁，但present得好有禮貌同淡定，令我印象好深，之後就做你公司model。畀心機！我睇好你！p.s.張相係我舊年中秋gathering，我上台獻唱，仲記得嘛？2. Alexis嘩！你blog提到我咁畀面？自從俾你「」中，我演藝工作簡直源源不絕，thx a lot！最近就拍一條奧運宣傳短片，雖然無香港播出，但有機會同日本奧運乒乓球選手福原愛對打，真係好開心！