真人騷 : 我在酒吧的日子（上集）

真人騷 : 我在酒吧的日子（上集）

新欄目〈真人騷〉，找來各行各業人士，現身說法，以寫blog形式，與大家分享他們工作上的苦與樂。
Marco 19歲
行業：Bar Tender
簡介：入職4個月的Marco，愛玩愛蒲，中五輟學後已轉過多份工。他的做人宗旨為「今天的事明天做，明天的享樂今日玩埋佢！」由最初入行只想溝女威，直至慢慢了解自身工作的意義與責任，現已成為獨當一面的bar tender。

2008-01-02
仲慘過讀書！
之前去蒲，成日見到班bar tender又型仔又識得多女，咁畀我知阿Wing做開間酒吧請人，咪叫佢介紹入行囉！點知第一日返工先知原來咁Q多做！我頂！除要記住50幾種cocktail點溝之外，原來啤酒都有分開杯上、樽裝同罐裝，譬如喜力呢隻牌子，杯上叫大喜、樽裝叫樽喜、罐裝叫細喜，煩到癲。由於今日酒吧大佬冇返，所以由老細阿Ken親自教我整幾杯大路cocktail，佢仲畀本「Bar Tender聖經」叫我「咪」熟佢。一杯cocktail有成6、7種成分，記死人咩！我記叻就讀緊書啦，使Q度做！
我睇兩頁個頭已經開始痛，諗諗想唔做，不過話晒都係個friend介紹入，又見呢度幾多索女，姑且做兩日睇定先……

2008-01-04
×到呢……
老細阿Ken話今日星期五要「炒場」，我問佢乜叫「炒場」，答案真係令我O晒嘴：「星期五酒吧一定爆，所以你要有心理準備會好忙，除酒吧，你仲要幫手遞餐serve客，乜都要做。」？我做bar tender叫我做waiter？佢仲即場教我落單，凍檸茶就寫「凍0T」之類。嘩！我酒都未記晒，就要我記埋呢。結果日我淨係洗杯都洗到手皮甩晒，又試過寫錯單、整錯cocktail，俾客狂×。本來我可以問個bar大佬或者經理，但我醒字派，乜都問佢咪好瘀皮？
最慘係要不停咁換生啤啤酒罐，大家咪以為係一「罐」啤酒罐，有圖畀你睇！仲「大咪」過保齡球呀大佬！放工陣腰痠背痛，本來約條女唱K，都係下次先……

2008-01-05
東主有喜休息一天
條女「詐型」，最後都係去唱K，食埋早餐返到屋企已經朝早十點。今日本來返下晝兩點，點知醒起身已經夜晚八點。電話勁多miss call，原來酒吧經理Angel打鑼咁搵我。「喂你去邊呀？今日好爆，唔見你連阿Ken都要落場呀……」
本來想打電話同Angel請假，都算有交帶！仲畀佢噴到一面屁咪笠佢線囉。腰痠骨痛，都係多陣……

2008-01-09
劈炮使乜驚呀？
一幾日，頭兩日Angel打，我都唔Q聽佢電話，你精我都唔笨，有乜返到公司先畀你一鑊過鬧。返到公司，阿Ken拉我埋一邊，諗住佢會「開我拖」啦！我做晒心理準備同佢撐過，點知佢只係好平靜、木無表情咁張支票畀我，同我講：「我知你係醒目仔，但做咁冇責任感，去到邊都死喎……」「收嗲啦你！」我未等佢講完就由佢手搶走張支票，跟住閃人，你老幾呀？得六千蚊人工想教訓我？
返到屋企，唔知點解，愈諗愈唔忿氣。由細到大住屋，你惡咩我一定惡過你，你鬧我咪同你鬥鬧囉，打都未驚啦，我從未輸過！但今日阿Ken咁平靜咁同我講，諗起佢勁輕視眼神，我覺得佢完全冇當過我係，所以都費事鬧我！我愈諗愈唔忿氣……不知不覺竟然流下「馬尿」……

網友回應
Ken 2008-01-09
你呢咁不負責任細路我見得多，本來我唔想同人教仔，但見你真係難得咁話頭醒尾，再加上今日說話都未講完。其實呢個世界聰明人唔係只得你一個，成功人就算幾聰明都要後天努力。你第一日返工同我講話要做到世界級bar tender，我當你係認真，你性格唔改，我諗你80歲都唔會做得到。你話你係醒字派，咁我想問你，其實你出世到家，有幾樣係全心全意去做，又做得成功？

Wing 2008-01-09
唉，大哥，你又唔做？識你咁耐，我都知你條友仔冇份工做得長，但你誓神劈願話今次一定起碼會做半年以上，我先介紹你入行。係咪跣我先？作為你朋友，都希望你有一番事業！你畀力出啦，你男仔……

下期預告
事先張揚！Marco下期將會回酒吧工作，雖然有番份工，但以Marco的爛玩懶做性格，點解可以捱到今時今日？那就要留意，只因一個Marco極親的人物將出場，影響他的想法……