商機收料站 : 電器連鎖店陳列室代表 中五程度月入$11,000

商機收料站 : 電器連鎖店陳列室代表　中五程度月入$11,000

會考完畢，好多同學仔都埋心水搵份長工，各行各業大公司亦放榜前爭人。04年大學畢業生都係得$8,000起薪點，家陣呢個只係中五畢業起步價錢。暑假之前，信興電器貿易公司就5月底，同勞工處搞招聘日，請陳列室代表、營業員、推廣員及營業代表共4類職務，全部只需中五程度，有經驗者優先、冇經驗都會考慮，雖然暑期工免問，但人工最高可去到$11,000。
信興電器貿易公司人事部發言人鄧小姐同我發錢韓講，4項職務之中，「陳列室代表」起薪點已經有$9,000，最高仲可以去到$11,000，視乎經驗而定；負責銷售各類家庭電器產品營業員，未計comissions，月薪亦有$7,500。以上各職位工作時間每天9小時，每週工作6天，仲有員工購物優惠、醫療保險計劃及內部培訓等褔利。

面試考銷售技巧
人工咁吸引，對員工亦有一定要求，所指唔係學歷，而係禮貌同銷售技巧。鄧小姐話：「暑假係大量電器用品如空調及美容電器產品銷售旺季，今次招聘4種職位，名額超過25名，主要信興旗下『人氣電器店』同『健一番』港九各分店返工，陳列室代表主要店內提供銷售服務，如銷售電器及健康美容產品，亦有機會參與展銷工作，所以曾銷售有關產品及參與展銷活動者優先考慮。呢份工作一定要有耐心聽取客人意見及解答問題，長時間保持親切及友善態度，太過情緒化或者詞不達意都好難應付到，所以銷售技巧要達到水準，即使冇sell過電器都唔緊要，面試時我可能會安排應徵者即場示範點樣sell一件產品，試佢禮貌、語氣同誠意方面係咪合乎我要求。」陳列室代表表現良好話，有機會晉升至陳列室主任，而營業員視乎表現及業績，有機會晉升至營業主任，兩者人工約為$13,000或以上。
鄧小姐仲話：「公司除會29日同勞工處合辦招聘日外，之後亦會在公司網頁http://www.shunhinggroup.com繼續招聘，務求聘請到適合人才。」想大機會見得成工，除見工時衣整齊面帶笑容，就要練習多介紹產品技巧！


主辦機構：信興電器貿易有限公司
日期/時間：5月29日（星期四）2:00pm至4:30pm
地點：北角渣華道333號北角政府合署12樓
聘請職位：營業代表、陳列室代表、推廣員、營業員
查詢電話：25684752

PROFILE
發錢韓，本身姓韓，由於見錢眼開的性格，所以朋友均稱呼他發錢韓。百足咁多爪，平時鍾意四圍八，與不同行業人士吹水收風，了解香港商機走勢。